Blog dos Bancos de Tempo da Costa da Morte

O 25 de Febreiro os seguintes concellos da Costa da Morte : Cabana de Bergantiños, Camariñas, Carballo, Cee, Corcubión, Coristanco, Laxe, Santa Comba, Val do Dubra, Vimianzo e Zas, creamos esta plataforma virtual para informar á cidadanía sobre os Bancos de Tempo e o seu funcionamento en cada un destes municipios.

Os Bancos de Tempo Municipais son un servizo que a Consellería de Traballo está a por en marcha e polo tanto descoñecidos para a maioría da poboación na nosa comunidade.

Este espazo foi creado co fin de informar sobre o servizo e achegalo á veciñanza e tamén como unha ferramenta de participación cidadá, posto que as persoas que o desexen poden insertar comentarios ou suxerencias ós nosos artigos.

O noso agradecemento pola túa participación e agardamos que este espazo sexa do teu agrado.

Aquí descubrirás outra maneira de investir o teu tempo !!

QUE É UN BANCO DE TEMPO?

Un banco de tempo é un novo servizo de intercambio de coñecementos, saber facer e experiencia entre a veciñanza do municipio. A moeda de intercambio é o tempo.

Este servizo pretende achegar de novo a comunidade, a que volten a comunicarse e a aprender uns de outros, cada un co seu ben facer invertirá horas en ensinar a outros e a outras pero sempre dunha maneira equitativa, xa que as horas serán controladas polo persoal técnico para que non haxa desigualdades no tempo invertido e recibido.

Por esta razón se chama banco de tempo, é dicir, eu invirto unhas horas pero tamén as vou recibir. Para esta tarefa haberá cheques, horarios, unha sucursal no concello, e unha persoa que se encargará de regular os intercambios.

QUE NON É UN BANCO DE TEMPO?

Non é un voluntariado, xa que no banco de tempo non só damos senón tamén recibimos.

Non é unha forma de realizar traballos ou servizos baratos, encubertos ou remunerados.

QUEN PODE FORMAR PARTE?

As persoas maiores de idade que residan no municipio.

POR QUE FORMAR PARTE?

As persoas usuarias do banco poderán, entre outras cousas:

• Coñecer novas persoas e crear novos vínculos sociais

• Fomentar valores como respeto, empatía e responsabilidade

• Compartir e adquirir coñecementos e habilidades

• Sacarte dun apuro

• Axudar ós demáis e tamén que nos axuden

COMO FUNCIONA?

A inscripción será gratuíta e individual. Realizarase unha entrevista previa para saber os servizos que oferta e demanda a persoa interesada en formar parte desta iniciativa e coñecer a súa mecánica.

Tódalas actividades que se intercambien teñen o mesmo valor, que é o tempo que se tarde en facelas.

Cando unha persoa preste un servizo poderá demandar outro. O tempo devólveselle ao banco, non á persoa da que se recibiu o servizo.

A persoa encargada da xestión do banco coordinará os intercambios.

QUE SERVIZOS PODEN EXISTIR NUN BANCO DE TEMPO?

Partimos da premisa de que todas as persoas temos algo que ofrecer e tamén algo que demandar ós demais.

O catálogo de servizos dun Banco de Tempo pode ser tan heteroxéneo e amplo como demanden ou oferten as persoas que participen nel.

Os servizos poden encadrarse dentro dunhas categorías co fin de ordenar o catálogo de servizos. Esta é unha listaxe das categorías nas que podemos encadrar os nosos servizos:

• Atención a persoas e Actividades de Acompañamento

• Saúde e Benestar

• Coidados en xeral

• Decoración e Bricolaxe

• Novas Tecnoloxías

• Xestións Administrativas

• Traballos Domésticos

• Actividades de Lecer

• Formación e Educación

• Compartir Vivenzas ou Organizar e Participar en Tertulias

• Outras

• O país de referencia en canto a intercambios de tempo é Italia, no ano 1992 o sindicato de pensionistas de Parma puxo en práctica o intercambio de tempo para resolver problemas da vida diaria. Actualmente contan cuns 300 Bancos de Tempo.

• Desde os anos 80 en EEUU desenrólanse os chamados “Time Dollar”, nos cales unha hora dun servizo equivale a un dólar de tempo, este mesmo sistema derivou nos Time Bank do Reino Unido.

• En Portugal a Asociación GRAAL e en unión transnacional con Barcelona, traballouse tamén nesta idea, actualmente contan con seis Bancos de Tempo funcionando e na preparación doutros dez.

• Na actualidade países como Arxentina, por mor da súa crise económica, tamén se fixeron eco desta idea e acadou gran importancia este sistema de intercambio.

• En España, Cataluña é unha comunidade pioneira, a primeira experiencia deste tipo puxérona en práctica no 1998 o Concello de Barcelona e a Asociación Salud y Familia.

• En Barcelona tamén existen outros tipos de intercambios de coñecementos e servizos, como por exemplo: el Punto de Intercambio Sagrada Familia, El Banco Solidario de Les Corts, El Banco de Intercambio de servicios de la Izquierda del Ensanche, etc

• No resto de España dende 1993, surxiron iniciativas de intercambio, promovidas por grupos alternativos en Madrid, Vitoria, Bilbao, Tenerife, Ávila, Logroño etc.

• En Galicia existen moitos Bancos de Tempo, entre eles o de Vigo, Allariz, Valladares, Ourense, Ferrol e dentro da provincia da Coruña uns 45 concellos están traballando actualmente na posta en marcha dos seus bancos de tempo ben sexan municipais ou de cidade.

• Algúns deles como o de Vigo tamén conta cunha plataforma virtual para comunicarse coas persoas que desexen informarse ou participar deste servizo.